Ispaniya transport vaziri Oskar Puente Urde fojiasidan soʻng isteʼfoga chiqishini maʼlum qildi
Ispaniya transport vaziri Oskar Puente Urde shahrida 69 kishi halok boʻlgan poyezdlar toʻqnashuvidan soʻng isteʼfoga chiqishini eʼlon qildi. Shuningdek, u muddatidan oldingi saylovlarda qatnashishdan bosh tortdi.
Bu haqda u Urde shahridagi temiryoʻl halokati munosabati bilan Kongressning Doimiy deputatlar komissiyasidagi chiqishi chogʻida maʼlum qildi. Toledo provinsiyasidagi Urde shahrida poyezdlar toʻqnashuvi oqibatida 69 kishi halok boʻlgan. Puente siyosiy javobgarlikni oʻz zimmasiga olayotganini aytdi va boʻlajak muddatidan oldingi saylovlarda qatnashmasligini bildirdi.
Vazirning soʻzlariga koʻra, Adif operatorining dispetcherlari LZB xavfsizlik tizimi ishdan chiqqanidan keyin AVE poyezdiga harakatni davom ettirishga ruxsat bergan, holbuki oldinda Iryo kompaniyasining poyezdi turgan edi. Shu bilan birga, Puente Madrid — Sevilya temiryoʻl liniyasi xavfsiz ekanini taʼkidladi va uning qiymati 780 mln yevro boʻlgan modernizatsiya dasturini eslatdi.
Muxolifat halokatdan keyingi ilk kunlardanoq vazirning isteʼfosini talab qilib kelgan. Xalq partiyasi va Vox uni javobgarlikdan qochishga urinayotganlikda aybladi.
Bu yil Madrid — Sevilya liniyasida allaqachon ikkita yirik avariya yuz berdi. Yil boshida Adamus shahrida poyezd halokatga uchrashi oqibatida 46 kishi halok boʻlgan edi. Adif xodimlari qoʻmitasi xavfsizlik choralarini kuchaytirishni talab qilish uchun 17-noyabr kuni ish tashlash oʻtkazilishiga erishishga harakat qilmoqchi.
