Qosimov, Jeparov va Ahmedov Pavlyuchenkoga qarshi: Oʻzbekiston va Rossiyaning media jamoalari Toshkentda oʻynaydi
10 noyabr kuni Toshkentda Oʻzbekiston va Rossiyaning media jamoalari oʻzaro bahs olib boradi. Bu katta futbol haftaligini ochib beradigan shou-oʻyin boʻladi: ikki kundan keyin ayni shu yerda ikki davlatning asosiy terma jamoalari uchrashadi.
Mezbonlar aralash tarkib bilan maydonga tushadi. Jamoada bir vaqtlar milliy terma jamoa sharafini himoya qilgan faxriy futbolchilar — Server Jeparov, Timur Kapadze, Odil Ahmedov, Anzur Ismoilov, Mirjalol Qosimov va Ignatiy Nesterov bor. Ularga estrada va ijtimoiy tarmoqlar yulduzlari — Badriddin Husniddinov, Komil Benom, Hamdam Sobirov, Bek Vines, Azimchik Vines va Mitti.me qoʻshiladi.
Mehmonlar ham taniqli yuzlarga tayanadi. Rossiya jamoasi safidan YouTubeʼda mashhur Mixail Litvin, Filipp Voronin va Anar Abdullayev joy olgan. Jamoaning asosiy ustunligi esa Rossiya terma jamoasi safida koʻp yillar davomida gol urgan Roman Pavlyuchenko boʻladi.
Oʻyin media turnirlarida qabul qilingan reglament asosida oʻtkaziladi. Tashkilotchilar fikricha, bunday uchrashuvlar futbol nafaqat professionallar, balki hamma uchun ochiq ekanini koʻrsatadi. Ular oʻyin odamlarni sport bilan shugʻullanish va faol hayot tarzini olib borishga ruhlantirishiga umid qilmoqda.
Tomoshabinlarga oldindan kelish tavsiya etiladi: koʻngilochar dastur soat 16:00 da boshlanadi. Qizdiruv dasturida «Benom» va «Bojalar» guruhlari, Rukhsoraemm, Adel hamda DJ King Maccarella chiqish qiladi.
