Husanov yoʻq, ammo Shomurodov bor: Kannavaro Rossiya va Saudiya Arabistoniga qarshi oʻyinlar uchun 30 futbolchini chaqirdi

Ularning toʻqqiz nafari xorij klublarida, qolgan 21 nafari esa Oʻzbekiston chempionatida oʻynaydi. Roʻyxatda eng koʻp futbolchi «Paxtakor»dan — besh nafar, «Navbahor»dan esa toʻrt nafar.

Abduqodir Husanov tarkibga kiritilmadi. Shifokorlar va murabbiylar himoyachi uchun hozir terma jamoada oʻynashdan koʻra, tiklanish jarayonini xotirjam yakunlash muhimroq, degan qarorga kelishdi. Eldor Shomurodov roʻyxatga kiritilgan, ammo u jamoaga kechroq qoʻshiladi: hujumchi oilaviy sabablarga koʻra yigʻinning dastlabki kunlarini oʻtkazib yuboradi.

Noyabrdagi yigʻin doirasida ikkita oʻrtoqlik uchrashuvi oʻtkaziladi. 12 noyabr kuni Kannavaro shogirdlari Toshkentdagi «Paxtakor»da Rossiyaga qarshi uy uchrashuvini oʻtkazadi. Besh kundan keyin, 17 noyabrda, ular Qatarning Doha shahridagi «Jassim bin Hamad» stadionida Saudiya Arabistoniga qarshi bahs olib boradi.

Kannavaro kimlarni chaqirdi

Darvozabonlar. «Nasaf»dan Abduvohid Neʼmatov va Samandar Murodboyev chaqirildi. Roʻyxatdan, shuningdek, «Paxtakor» vakili Vladimir Nazarov va Samarqandning «Dinamo» klubi darvozaboni Edem Nemanov ham joy olgan.

Himoyachilar. Xorij klublarini toʻrt futbolchi — Jahongir Urozov (Qozonning «Rubin» klubi), Mahmudjon Mahamadjonov (Maxachqalʼaning «Dinamo» klubi), Behruzjon Karimov (Shveysariyaning «Lugano» klubi) va Rustamjon Ashurmatov (Eronning «Istiqlol» klubi) — vakillik qiladi. Oʻzbekiston chempionatidan «Paxtakor» futbolchilari Sherzod Nasrullayev va Muhammadrasul Abdumajidov, «Nasaf»dan Dilshod Murtazoyev hamda «Qizilqum»dan Gʻiyosjon Rizakulov chaqirilgan.

Yarim himoyachilar. Bu roʻyxatdagi eng katta guruh boʻlib, unda 15 nafar futbolchi bor. Xorijdan Odiljon Hamrobekov (Eronning «Traktor» klubi), Azizjon Gʻaniyev (BAAning «Baniyas» klubi), Umarali Rahmonaliyev (Ozarbayjonning «Sabah» klubi) va Abbosbek Fayzullayev (Turkiyaning «Istanbul Bashakshehir» klubi) chaqirilgan. «Navbahor»ni Diyor Xolmatov, Ruslan Jiyanov va Jasur Jaloliddinov vakillik qiladi. «Paxtakor»dan Akmal Mozgovoy va Dostonbek Hamdamov, AGMKdan esa Nodir Abdurazzoqov va Aziz Xolmurodov chaqirilgan. Bundan tashqari, roʻyxatda Azizbek Toʻlqinbekov («Bunyodkor»), Sherzod Esonov («Buxoro»), Behruz Oʻktamov («Surxon») va Abrorbek Ismoilov («Neftchi») ham bor.

Hujumchilar. Hujum chizigʻiga Turkiyaning «Istanbul Bashakshehir» klubidan Eldor Shomurodov boshchilik qiladi. Undan tashqari, «Navbahor»dan Husayn Norchayev va Samarqandning «Dinamo» klubidan Azizbek Amonov chaqirilgan.