Toshkent Milliy bogʻida olti yil avval quritilgan koʻl qayta tiklanmoqda

Oliy Majlis Qonunchilik palatasi binosi yonidagi Oʻzbekiston Milliy bogʻida sunʼiy koʻl yana barpo etilmoqda. Taxminan uch gektarlik hududda hozir tuproqni tayyorlash ishlari olib borilmoqda. Bu haqda Ekologiya va iqlim oʻzgarishi milliy qoʻmitasi xabar berdi.

Loyiha «Toza havo» umummilliy tashabbusi doirasida amalga oshirilmoqda. Uning vazifalari — chang miqdorini kamaytirish, havo sifatini yaxshilash va Toshkent mikroiqlimini yaxshilash.

Suv havzasi 2020-yil bahorida quritilgan edi. Shundan soʻng uning oʻrnida kuzatuv minorasiga ega Light House restoran majmuasini qurish rejalashtirilgan. 2021-yilda esa bu hududda Milliy akademik drama teatrining yangi binosi qurilishi boshlandi, biroq ushbu loyihalarning hech biri yakunlanmadi.

Eʼlon qilingan render yangilanayotgan hududda ikkita katta favvora, sayr yoʻlaklari va koʻzgusimon qoplamali arka paydo boʻlishini koʻrsatadi. Koʻlning kelajakdagi koʻrinishi ushbu eskizga mos kelishi hozircha tasdiqlanmagan.

Loyiha poytaxtda 12 ta sunʼiy suv havzasini qurishni nazarda tutuvchi dasturga kiritilgan. Yana bir nechta obyektni aeroport va Gʻalaba bogʻi yonida, shuningdek, Uchtepa tumanida, Botanika bogʻida hamda sobiq ipakchilik ilmiy-tadqiqot instituti hududida barpo etish rejalashtirilgan.

Mavjud koʻp yillik daraxtlarni saqlab qolish, kichik oʻsimliklarning bir qismini esa mos joylarga koʻchirish rejalashtirilmoqda. Natijada hududda yangi rekreatsiya zonasi va yanada qulay mikroiqlim yaratilishi kerak.